อสฺสาสปสฺสาสา น นิรุชฺฌนฺตีติ ฯ กลฺโลสิ ภนฺเต นาคเสนาติ ฯ

อสฺสาสปสฺสาสปญฺโห เตรสโม ฯ

ราชา อาห ภนฺเต นาคเสน สมุทฺโทติ วุจฺจติ เกน การเณน อาปํ อุทกํ
สมุทฺโทติ วุจฺจตีติ ฯ เถโร อาห ยตฺถกํ อุทกํ มหาราช ตตฺตกํ โลณํ ยตฺถกํ โลณํ
ตตฺตกํ อุทกํ เตน สมุทฺโทติ วุจฺจตีติ ฯ ราชา อาห ภนฺเต นาคเสน เกน การเณน
สมุทฺโท เอกรโส โลณรโสติ ฯ เถโร อาห จิรฏฺฐิตตฺตา โข มหาราช อุทกสฺส สมุทฺโท
เอกรโส โลกณรโสติ ฯ กลฺโลสิ ภนฺเต นาคเสนาติ ฯ

สมุทฺทปญฺโห จุทฺทสโม ฯ

ราชา อาห ภนฺเต นาคเสน สกฺกา สพฺพสุขุมํ ฉินฺทิตุนฺติ ฯ เถโร อาห
อาม มหาราช สกฺกา สพฺพสุขุมํ ฉินฺทิตุนฺติ ฯ กึ ปน ภนฺเต สพฺพสุขุมนฺติ ฯ ธมฺโม
โข มหาราช สพฺพสุขุโม น โข มหาราช ธมฺมา สพฺเพ สุขุมา สุขุมนฺติ วา ถูลนฺติ
วา ธมฺมานเมตํ อธิวจนํ ยํ กิญฺจิ ฉินฺทิตพฺพํ สพฺพนฺตํ ปญฺญาย ฉินฺทติ นตฺถิ ทุติยํ
ปญฺญาย เฉทนนฺติ ฯ กลฺโลสิ ภนฺเต นาคเสนาติ ฯ

สุขุมเฉทนปญฺโห ปณฺณรสโม ฯ

ราชา อาห ภนฺเต นาคเสน ปญฺญา กุหึ วสตีติ ฯ น กตฺถจิ
มหาราชาติ ฯ เตนหิ ภนฺเต นาคเสน ปญฺญา นตฺถีติ ฯ ตํ กึ มญฺญสิ
มหาราช วาโต ปน กุหึ วสตีติ ฯ น กตฺถจิ ภนฺเตติ ฯ เตนหิ มหาราช นตฺถิ
วาโตติ ฯ กลฺโลสิ ภนฺเต นาคเสนาติ ฯ

ปญฺญาวิเสสปญฺโห โสฬสโม ฯ

ราชา อาห ภนฺเต นาคเสน ปญฺญาติ วา วิญฺญาณนฺติ วา ภูตสฺมึ ชีโวติ
วา อิเม ธมฺมา นานตฺถา เจว นานสพฺยญฺชนา จ อุทาหุ เอกตฺถา นานาพฺยญฺชนา-
เยวาติ ฯ เถโร อาห วิชานนลกฺขณํ มหาราช วิญฺญาณํ ปชานนลกฺขณา ปญฺญา ภูตสฺมึ
ชีโว น อุปลพฺภตีติ ฯ ราชา อาห ยทิ ชีโว น อุปลพฺภติ อถ โก หิ จกฺขุนา
รูปํ ปสฺสติ โสเตนปิ สทฺทํ สุณาติ ฆาเนนปิ คนฺธํ ฆายติ ชิวฺหายปิ รสํ สายติ กาเยนปิ
โผฏฺฐพฺพํ ผุสติ มนสาปิ ธมฺมํ วิชานาตีติ ฯ เถโร อาห ยทิ ชีโว จกฺขุนา รูปํ